ابستأذن القمه وبرضيك يا سلمان
وباخذ مع الخمه على قافهم شوطين
اباطا على الجمره وبكيف الخرمان
وبنزل على واد الضما وروي الضامين
مع ان البيوت الوارده تفقد الاوزان
ركيكه بلا معنى ويبغالها تحسين
ولوهو ضحك تركي وصفق لها غسان
علي الحرام ان الهوا يشخل الجنبين
وهذا دليل ان السوابق لها فرسان
وثوب العواري ماستر عوره العارين
مشاعر يتيمه وامها حضرت الفهمان
يدرر لها الخلفه وتشرب من الشقين
يطيح العشاء لاصّدرت والبطن مليان
ضوت للحليب الثلث ويبقى لها ثلثين
وكبرت وصارلها ثنايا لبن واسنان
وكبّر لها اللقمه ونشبت على الفكين
ولاهي غريبه شطحت الخبل يا سلمان
تبي تكبر وتلقى من الشاكله عشرين
سجاح الكذوبه شاطحه ب اول الازمان
تقول النبوه عندها تغوي المصغين
يُاذن مؤذنها لجل يجمع العربان
ولكن عثرها الله وقفت مع المقفين
صراحه وبطرحها على كفت الميزان
لجل ترضي الضايق ولاتزعل الراضين
عموم الدول لظروفها تفتح البيبان
وتترك رعايها على منفذ الحدين
احد واثق الخطوه وحد تايه وبلشان
قضى معظم ايامه يدور على تعيين
يجي با الزمن لجه صدى بهرجه واعلان
وتلقح مع المنسي على خبره المعطين
ويلقى مع الزحمه على ذمه البطران
رقم شاغر امعين على رتبت انت امنين
وانا من عرفت العلم ربعي هم العتبان
زحول الرجال اللي على صلبهم راسين
ولافيهم الباير ولا فيهم الخوان
ولا قدسو علي ولا قدسوه احسين
زعامه وذبح الحيل في واجب الضيفان
شجاعه ولطم العيل لاعالو المخطين
عسى الفلسفه تغني عن الشرح والتبيان
ومن عقبها بترك سطر فاضي وقوسين
ابفهم اللي ترسمه ريشه الفنان
على الصوت والصوره لجل يعجب الغاوين
انا لا ضربت اضرب برجلي على اللحيان
اعزم الصراحه وانحر الشك با السكين
احده على اليمه وهو يطمر الجرفان
فضيحه وثبتها على نفسه المسكين
يقول السوالف كلها مالها ثبتان
وانا اقول واجه واترك الهرج والتخمين
اقدم براهين وحقايق وحلف ايمان
عليها شهود ولاتبي نشدت المفتين
حقيقيه ولو تكمن على شفت الطرمان
على وجوههم تظهر تعابيرها وتبين
واذا هي سلام انا على لحيتي شرهان
حسافه ومحسوبه عليه ليوم الدين
سلامي شرف والا انت من قوم ابو عدنان
تبوس الكفوف ولحيتك مالها تثمين
وعلى طاري الحيله تبي تمدح ابليهان
تبي تغسل الحنى عقب لوّن الكفين
على عهدنا الاول تماديت يا ضبيان
وعلى عهدنا الثاني تبي تنقل الوجهين
وعلى دربها تجحد مواقف لها عرفان
افضول الرجال اللي لها نسبه التسعين
عشان العزاوي شمرو دونك الذرعان
لك ارخو رسايلهم ومدولك التموين
ولكن صحيح ام(ن)بلانا بها الشيطان
عسى الله يجنبنا رباء مكسب التأمين
يزيد اعترافك با الهزيمه مع الكتمان
اشوف البشر يمك اتناظر بنص العين
ولا ضنتي من يقبل الذل والخذلان
يبي يرتكي لحمول الاقصين والادنين
مثل من يقول الحر يشهر بلا جنحان
ومثل من يقول الحنضله في طعمها زين
نصيحه لوجه الله يافلان ولد افلان
لاشفت الجمل هادر فلا تنطحه بقرين
ومادامها خربت وفاحت وكلش بان
تجنب عن الساحه ولا تشحذ البيتين
ودور على خيمه وسطحه ورى ببان
وكد الحديد وحط رقمك على البابين
موضوع: ابستأذن القمه وبرضيك يا سلمان 
الجمعة يونيو 12, 2009 2:52 am
